طبعا لسان حال كل ام انا مش محتاجة اعلمه يقول لأ هو طول الوقت بيقولها .. بس في اطفال ثانين محتاجين يتعلموا يقولوا لأ للطلبات الي مش عاوزنها .. ومش بس الاطفال على فكرة .. احنا كمان اوقات كثير مابنعرفش نقول لأ لحجات احنا مش عاوزينها
جاتلي ام تشتكي ان ابنها معندوش ثقة في نفسه
بيتضرب في المدرسة مش بيدافع عن نفسه
وكمان بيرجع البيت مش بيشتكي ولا بيقول هو اتعرض لايه في المدرسة
لما جينا نشوف الام بتعامله ازاي في البيت
الام عصبية .. بتزعق كثير .. بتنتقد كثير .. عاوزة ابنها ينفذ كلامها من غير ما يناقش
هي تقوله يعمل كذا .. ينفذ من غير ما يسئل ليه ؟
انت تعمل الي بقوله وبس .. من غير نقاش
هنا الام هي الي كسرت ابنها من الاول .. حولته لانسان متبرمج ينفذ اوامر وبس .. ممنوع يفكر .. ممنوع يعترض
ممنوع يعبر عن رايه .. وطول الوقت يتعرض لعدوان الام
( عصبية _ نقد _ زعيق )
لما يتعرض للسلوك ده من المدرسة .. هو ما اتعلمش انه يعترض او يرفض او يدافع عن نفسه .. فيكون ضحية للمتنمرين
وده طبعا يضعف ثقته بنفسه اكثر وممكن يتحول لانسان عدواني من كثر ما كان ضحية ويبدأ يؤذي اي حد يشوفه
و ندخل في مشاكل من نوع مختلف
مهم نعلم اولادنا انهم يفكروا .. ويناقشوا .. عشان يكون ليهم شخصية ويعرفوا ياخدوا قرارات .. ويعرفوا يدافعوا عن حقوقهم .. وده لازم يبدأ من البيت الاول
لما ابنك تطلبي منه يلبس لبس محدد ويرفض .. اسئليه ليه .. واسئليه تحب تلبس ايه .. وقدميله ثلاث اختيارات وخليه يختار مابينهم .. كده انت علمتيه يختار ويكون ليه راي وعمل الي انت عاوزاه برده
ابنك مش عاوز ياكل دلوقتي .. حطي الاكل قدامه وقوليله وقت ماتجوع الاكل عندك .. حياكل على طول ويبقى اتعلم انه يرفض ويقول لا .. واتعلم انه يختار
لما يطلع للمجتمع وحد يطلب منه طلب هو رافضه حيعرف يقول لا .. ويرفض .. ويكون ليه شخصية
كلمة لا .. الناس بترفضها من اولادهم .. مع انها مهمة جداا في تكوين شخصياتهم
