ابني متربي انه يعمل كل حاجة صح .. طول الوقت بيقول حاضر وينفذ الكلام .. ياترى ده صح ولا غلط ؟
التربية وتحمل المسئولية
تعالوا كده نبدء من ورى لقدام ….
زوجة بتشتكي من زوجها .. ده ابن امه .. كل مايتخانقوا ينزل يروح عند ماما ..
مش عارف يرد على زوجته .. تعالي يا ماما شوفي بتعمل ايه …
محتاجين سباك او كهربائي .. الزوجة هي الي تقابله .. وهي الي تودي ابنها لحلاق رجالي
وغيرها من السلوكيات
تعالوا نرجع ورى شوية ونشوف الراجل ده اتربى ازاي
العائلة فيها ام واب وبنت و ولد
الام .. قومي يابنتي شوفي اخوكي عاوز ياكل ايه .. اكل خلاص .. شوفي لو عاوز يشرب حاجة .. اعملي لاخوكي عشان بيذاكر .. اكل وشرب وساب الحاجة مكانه .. شيلي مكان اخوكي عشان انت بنت .. البنت هي الي بتشتغل في البيت .. اخوك رااااجل .. هما كانوا يقصدوا يقولو ذكر .. معلش
هنا عملنا ايه في التربية؟
ربينا البنت على تحمل المسئولية بزيادة حبتين .. وتكبر على انها تفني نفسها من اجل ارضاء الاخرين .. مش مهم هي .. المهم الاخر .. وفي النهاية ينتهي بيهم الحال باضطرابات قلق .. اكتئاب .. صداع نصفي .. قولون عصبي .. وغيره
طيب الذكر !!
اتعلم انه سي السيد الي يتخدم وبس ومايتحملش اي مسئولية
طيب الحل ايه ؟
اولا نربي الابن على ان الولد زي البنت
نكلفهم بنفس المهام .. لما الولد يخدم نفسه ده مش حينتقص من ذكورته .. الرسول عليه الصلاة والسلام كان في خدمه اهل بيته
نعلم البنت ان ليها حقوق وعليها واجبات
نعلم البنت انها يكون ليها راي .. تناقش وتقبل او ترفض .. عشان يكون ليها شخصية وتكبر على كده و ده يحميها في المستقبل
نعلم البنت انها مهمة ومش لانها بنت يبقى تكون شغالة في البيت .. لكن عليها دور تجاه اسرتها و الولد كمان
لما نطلب منهم نطلب نشرح لهم السبب .. مش نقول اسمع الكلام وخلاص .. قول حاضر من غير ماتناقش .. لانهم حيكبروا على كده .. ده مش ادب .. احنا كده بنلغي شخصيته .. ولما يكبر اي حد حيطلب منهم اي حاجة صح او غلط حيقولوا حاضر لانهم ما اتعلموش انهم يفكروا ويناقشوا ويرفضوا او يقبلو
ده يطلع لنا شباب عندهم احساس بالمسئولية وان الحياة مشاركة وده يسبب النجاح في حياتهم الزوجية
لا توجد تعليقات