انا بسيب ابني قاعد على التلفزيون طول اليوم عشان يفضل ساكت ومايعملش مشاكل في البيت .. تعالي نشوف مع بعض تاثير الكرتون على شخصية الاطفال
برامج الكرتون وتاثيرها على شخصية الاطفال
من 20 سنة تقريبا كانت شركة والت ديزني بتعرض برامج كرتون بتعبر عن قصص اجتماعية زي هايدي .. وسنوايت .. وسندريلا .. و الاسد الملك .. والكلاب المنقطة …
هايدي كان بيتكلم عن قصة طفلة بريئة مع جدها الي كان عصبي وحاد في التعامل و مايعرفش يبتسم والتكشيرة دائما على وشه .. لما عاش مع حفيدته .. بدا يهتم بيها واتعلم يبتسم ويضحك
سنووايت بتتكلم عن معاملة زوجة الاب .. واذاي في النهاية الاميرة الصغيرة تقابل فارس الاحلام وياخدها على حصانه الابيض ويسافر
سندريلا .. نفس القصة .. زوجة الاب و الامير اعجب بيها ودور عليها في كل البلد لحد ما وصل لها
كان فيهم جانب بيتكلم عن صعوبات بتقابلها البنت وجانب ثاني فيه رقة و احلام رومانسية
في الاسد الملك اتكلم عن غيرة الاخوات .. الغيرة خلت الاخ يقتل اخوه عشان ياخد منه الحكم .. وازاي الاسد الصغير ابن الملك المتوفى كبر واعتمد على نفسه ورجع يسترد حقه في الحكم
الكلاب المنقطة كان فيه مشاهد عن الحب والعدوان .. مشاهد عن اهمية العائلة .. تقديم المساعدة للاخرين .. العطاء والتعاطف .. العلاقة بين الانسان و الكلاب بشكل ايجابي
كرتون زي كابتن ماجد .. بيتكلم عن حب كرة القدم وممارستها
نوع ثاني من افلام الكرتون .. كان ليه تاثير سلبي على الاطفال زي
كرتون سبايدر مان وباتمان … بيعبر عن نوع من الخيال .. والقوة المفرطة .. .. ولاحظنا خطورة الافلام دي .. لما طفل خرج من بيته ونزل من الشباك ووقف متعلق في النص مش عارف يكمل
افلام الرعب .. والقتل .. واستخدام الاسلحة … كلها ليها تاثير سلبي جدااا على شخصية الاطفال .. بتخلي عندهم شخصية قلقة .. وممكن يحلموا بكوابيس مزعجة ويصحو من النوم في حالة فزع
الافلام الي ليها تاثير سلبي جدااا في تكوين شخصية الاطفال والقيم و الاخلاق عندهم .. افلام الكرتون الي بتحتوي على صور ومشاهد ذات محتوى جنسي .. سواء في شكل اللبس العاري الي بتلبسه الاناث .. او بعض المشاهد مثل القبلات .. او طريقة الجلوس زي الصورة المعروضة وغيرها من المشاهد الي بيكون ليها تاثير سلبي جدااا في تكوين قيم الطفل وشخصيته
مش معنى كده اننا حنمنع الاطفال من مشاهدة الكارتون .. لكن ضروري متابعة مشاهد الكارتون مع الطفل .. للتأكد من مناسبته لعمر الطفل .. واستبدال بعض افلام الكرتون .. بانواع ثانية مفيدة موجودة على اليوتيوب بتعلم الطفل سلوكيات ايجابية .. زي الصدق و الامانة وعدم الكذب .. فيديوهات تعليمية وثقافية …
من الضروري مناقشة الطفل في الاحداث السلبية الي بيشوفها في الكرتون زي القوة الخارقة والقتل والمشاهد غير المناسبة …
الطفل مش بيكون عنده القدرة على التفكير النقدي للاحداث .. مش بيعرف يفرق بين الواقع و الخيال … بيقبل كل الاحداث ويستدمجها داخله .. مناقشة الاحداث مع الطفل تساعده على اكتساب السلوكيات المفيدة … ومعرفة الفرق بين الواقع والخيال .. وبين السلوك المرغوب و السلوك السيء … وبالتالي نكون شخصية ايجابية عندها قدرة على التفكير النقدي و نقلل من السلوكيات السلبية او الضارة الي ممكن يتعلمها عن طريق برامج الكرتون . مع الحرص على متابعة مشاهد الكرتون التعليمية .. سواء بتعلم حروف وكلمات وارقام او بتعلم الطفل الالوان واسماء الفواكه او بتعلمه سلوكيات اجتماعية مفيدة .. او فيديوهات تثقيفية زي ازاي يتصرف لو حد كان عاوز يخطفه او يتحرش بيه
لا توجد تعليقات