ابني عنيد

ياترى اولادنا عنيدين فعلا ولا احنا الي مش عارفين نتفاعل معاهم بشكل صحيح ؟

العند عند الاطفال

دي شكوى كل الامهات بتشتكي منها

بس ياترى اولادنا عنيدين فعلا ولا احنا الي مش عارفين نتفاعل معاهم بشكل صحيح ؟

الطفل في عمر سنتين اول كلمة بيتعلمها هي انه يقول لا

لا هنا معناها انا موجود _ عاوز يحس بوجوده

بيكون عاوز يختار ويكون ليه راي

الاسرة بتتعامل مع لا في الطفولة بطريقتين

الطريقة الاولى

انها تعلم الطفل فعلا انه يكون مستقل، انه يفكر ويتصرف _ حتى لو غلط _ يتعلم من غلطه _ فيطلع عندنا طفل عنده تحمل مسئولية وبياخد قرارات لما يكبر

الطريقة الثانية
الي هي تقيد الحرية _ انت طفل _ مش فاهم _ انا اكبر منك _ انا عارفة مصلحتك _ مطلوب منك تنفذ الكلام وتقول حاضر وبس _ من غير ما تفهم ولا تسئل ليه.

في الطريقة الاولى _ محتاجين ان الاسرة يكون عندها درجة من المرونة والحرية عشان يقدروا يدوا لأولادهم مساحة من الحرية

الطريقة الثانية _ حيظهر عندها مشكلة الطفل العنيد المتمرد _ ويبدا كل طرف فيهم الاب والابن في العناد _ وفي الاغلب الاولاد بيكون عندهم نفس اطول وبينتصروا في الاخر

في المراهقة _ الطفل الي مكنش مسموح ليه انه يقول لا وهو طفل صغير _ حيقولها بشكل اقوى في المراهقة _ وتظهر لنا مشاكل التمرد بين الاباء والابناء

او ممكن يظهر لنا نمط ثاني من المراهقين _ عندهم مشاكل الخجل الاجتماعي وعدم القدرة على التفاعل مع الاخرين _ ومايعرفش يطالب بحقوقه او يدافع عنها _ لانه اتعود انه يكون شخص خاضع للوالدين _ الي فرضوا سيطرتهم عليه وضيعو ثقته في نفسه

السؤال الاول
ليه مطلوب من الابن يسمع الكلام وينفذ من غير ما يعترض؟
الطفل الي بيعترض ويطلب يعبر عن رايه ده طفل حيكون عنده شخصية فيها نضج لما يكبر ويعرف يتعامل مع المواقف
اما
الطفل الي مطلوب منه يسمع الكلام وينفذ من غير ما يفهم _ لما يكبر مش حيعرف يتصرف ولا يعمل اي حاجة لانه ما اتعلمش يفكر ولا يعبر عن رايه _ حيكون عندنا انسان عنده شعور بالفشل والعجز وعدم تحمل للمسئولية

حتيجي الام وتقول مش كل الطلبات ينفع الطفل ينفذ كلامه فيها .. في حاجات ماتنفعش كلامه هو الي يمشي

هنا حيجي دور الحوار والاتفاق ونلاقي حل وسط يرضي الطرفين

طيب احنا في سوبر ماركت والولد شبط في كذا حاجة وبيحرجني .. ازاي انفذ اسلوب الاتفاق معاه ؟

من قبل ما نروح السوبر ماركت بنحدد الطلبات .. ونكتبها في ورقة .. انت ليك حاجتين مثلا .. ونكتبهم .. ولو شبطت في حاجة ثانية يبقى كده حنلغي الاتفاق ونمشي من غير ما نشتري حاجة خالص .. لو الطفل شبط .. بنفكره باتفاقنا .. لو اصر وبدا يعيط .. ننفذ الجزء الثاني من الاتفاق .. اننا نمشي ونلغي الطلبات .. وبعدها نعلم الطفل ان ده ناتج عن عدم التزامه بالاتفاق، بكده نعلم الطفل انه يتحمل مسئولية قرارته