عايز تعرف الاكتئاب بيعمل ايه في المخ .. تعالي أقلك …
عشان تتأكد ان الاكتئاب مش مجرد شوية زعل و خلاص , أو شوية سيروتونين و لا مش عارف ايه قليل و بس … شوف معايا البحث ده
البحث ده اتعمل على شباب أصحاء، كانوا بيحللوا فيه اشارات المخ و إزاي المخ بيتعامل مع فكرة “المتعة المتوقعة” أو الإحساس بالإنجاز والاستمتاع لما نكسب حاجة , و ازاي ده بيتحول في الاكتئاب لعرض اسمه ال Anhedonia
اللي اكتشفوه إن الناس اللي عندهم صفات قريبة من الاكتئاب (حتى لو مش مكتئبين فعلًا) مخهم بيتفاعل بشكل أضعف جدًا مع المكافأة او المتعة او الحاجات اللي بتسطهم ، كأن الجزء اللي بيقول “دي حاجة حلوة.. استمتع!” صوته واطي أو مطفي شوية.
يعني لما بيكسبوا أو يحصلهم حاجة حلوة في حياتهم ، المخ مش بيفرز نفس الإشارات اللي بتخلي الشخص يحس بالمتعة أو الرضا زي الناس التانية.
وده بيفسّر ليه الشخص المكتئب مش بيحس بالفرحة حتى لو عمل حاجات كان بيحبها زمان لأن نظام المكافأة في دماغه مش بيشتغل بالكفاءة الطبيعية.
البحث ده بيأكد إن الاكتئاب مش مجرد “حزن”، لكنه خلل في طريقة استجابة المخ للمكافأة، وده اللي بيخلي المريض يحس إنه فاقد الشغف والطاقة، او بعني طبي شوية عنده عرض ال Anhedonia حتى لو حاول يعمل اللي المفروض يفرّحه.
وده معناه إن العلاج مش بس لازم يركّز على تقليل الحزن أو الأفكار السلبية، لكن كمان على إعادة ضبط منظومة المخ معرفيا و بيولوجيا ، سواء بالعلاج الدوائي أو السلوكي، عشان الشخص يرجع يحس بالاستمتاع تاني.
