كثير من الاجداد بيتعامل مع الاحفاد بدلع واهتمام زيادة وممكن ده يكون على عكس نظام الام في البيت
المثل بيقول اعز من الولد .. ولد الولد .. الام بتربي اولادها في بيتها على نظام محدد .. نظام للاكل .. نظام للنوم .. نظام في المصروف او الخروج .. وغيره
بس دائما تيجي شكوى من الامهات ان ابني طول ماهو في بيتي بيسمع الكلام واول ما يروح بيت جده كل حاجة تتغير ومايسمعش الكلام وتظهر الشقاوة .. ومابكونش عارفة احكمه خالص .. يا ترى المشكلة فين ؟
لما نيجي نشوف المشكلة نلاقي ان الجد بيكون مشتاق لحفيده .. ويبدا يدلعه اول مايشوفه .. لان حفيده بيجي عنده فترة صغيرة ..
الام تيجي تقول لابنها بلاش شقاوة ..
الجد يقول سيبي الولد على راحته
الام تقول جه وقت النوم يا اولاد ..
الجد يقول سيبي الولد قاعد معايا شوية
سوى كان الجد والد الام او الاب
الي بيحصل هنا ان الام مش بتحب تضايق الجد وتحترم قراره .. هنا الولد يتعلم ان في وجوده في بيت جده امه ملهاش راي وكلام جده هو الي بيمشي فيبدا يرفض اي قرار للام
الصح ان الجد يدلع حفيده ويلعب معاه لكن مايتدخلش في قرارات الام والاب عشان مايكسرش سلطتهم قدام الابن
قرار ماما وبابا هو الي يمشي
ولما الجد يقول للام خليه يقعد شوية .. الام تقول معلش ياجدو عشان متعودين على نظام مش عاوزين نبوظه
