بتاخد دواء للاكتئاب بقالك مدة كبيرة ولسه مشاكلك زي ماهي .. الحل هو العلاج السلوكي المعرفي
يعني ايه علاج معرفي سلوكي للاكتئاب؟
مريض الاكتئاب الي بياخد علاج دوائي فقط بيتحسن لفترة نتيجة تأثير الدواء لكن أسلوب حياته لسه زي ما هو .. لما يوقف الدواء يرجع ثاني لنفس الأعراض
طيب ايه الحل؟ هيفضل طول عمره ياخد دواء؟
لا طبعا..
بنسمع كثير من الناس بتقول انا باخد الدواء بقالي سنين ولسه انا زي ما انا
بنسأله .. انت عملت جلسات علاج سلوكي معرفي .. يقول لا
دلوقتي انا حبيت اعرفكم يعني ايه علاج سلوكي معرفي
اولاً.. بنوضح للمريض ان أسلوب تفكيره بيأثر على مشاعره وبالتالي بيأثر على سلوكياته.
بنعلم المريض ايه هي اخطاء التفكير وازاي يتعلم يرصد افكاره عشان يعدلها.
. تعديل الافكار هيترتب عليه تعديل السلوك
بيتعلم المريض ان الضغوط دي حاجة طبيعية في الحياة كلنا بنعيشها لكن لازم نعرف ازاي نتعامل مع الضغوط بشكل ايجابي ونقلل من تأثيرها علينا
بنتعرف على المهارات الاجتماعية الي فيها خلل عند المريض ونشتغل على تنميتها
بنشتغل على الثقة بالنفس ونطورها
بنعلم المريض ازاي يرفض ويقول لا للحاجة الي هو مش عاوزها
بيتدرب المريض على اساليب الاسترخاء الي هي جزء اساسي من العلاج والتخلص من الضغوط
بنشجع المريض على ممارسة هواية او نشاط يسعده
بنطلب منه يعمل جزء من اليوم خاص بيه للراحة او الترفيه
بنشجع المريض على تكوين صداقات او ممارسة رياضة او التمشية بشكل يومي
بالطريقة دي .. بالتزام المريض بجلسات العلاج والواجبات المطلوبة منه .. بيتغير شكل وجودة حياته للافضل ويتعلم ازاي يواجه الضغوط بدون ما يدخل في اكتئاب
