مهم نسئل نفسنا في الاول هو الطفل عصبي ليه؟
الطفل العصبي
مهم نسئل نفسنا في الاول هو الطفل عصبي ليه؟
بعض الاطفال بيكون عندهم اضطرابات عضوية زي التوحد او ضعف السمع او مشاكل النطق .. فالطفل هنا بيكون عاوز يتواصل مع الي حواليه ومش قادر فيظهر سلوك العصبيه تعبير عن شعوره بالعجز
الاطفال الي عندهم اضطراب فرط الحركة وتشتت الانتباه بتكون الام دائما تطلب منهم طلبات وهم مش بيركزو فينسوا .. فيكونوا عرضة للنقد كثير والعقاب كثير او اللوم كثير .. فده يخلي الطفل عصبي
الطفل الطبيعي الي حاسس ان مامته بتفضل اخوه عليه
او الطفل المهمل الي بيحس بتجاهل من اسرته
او الطفل المعنف الي بيتعامل بقسوة داخل الاسرة
او لو احد الابوين عصبي الطفل بيتعلم منهم العصبية
او ممكن يتعلم السلوك ده من خلال مشاهدة طفل ثاني بيعمل كده سواء كان ده في الحياة الفعلية او من خلال برامج الكرتون
شعور الطفل بالرفض او الاضطهاد سواء داخل الاسرة او في المدرسة او تعرض الطفل للتنمر
الطفل المدلل الي كل طلباته تنفذ فورا ولو ما اتنفذتش الولد يتعصب
في بعض الاحيان يكون الهدف من العصبية هو لفت انتباه الام عشان عاوز يحس منها باهتمام او مش عاوزها تنشغل عنه
الي يزود سلوك العصبية ويدعمه لو الطفل لاحظ انه لما يتعصب الي عاوزه بيتعمل .. هنا الطفل بيتعلم انه كل ما يعوز حاجة يتعصب
ازاي اتعامل مع غضب الطفل ؟
اولا لازم اكون واعية ايه الهدف من الغضب .. لو هو غيران من اخوه .. ضروري اعالج المشكلة دي من خلال اني اوقف التمييز الي بيحصل لاخوه واطلب من ابني سلوكيات بسيطة وامدحه لما يعملها عشان احسسه بالاهمية
لو اتعلم العصبية من احد الابوين .. يبقى هنا لازم الاب العصبي يتعلم يتحكم في غضبه
لو محتاج اهتمام اكون واعية بده كأم واخصص وقت للكلام واللعب مع ابني
طيب وقت ما يتعصب حعمل ايه ؟
حطلب منه بأسلوب فيه حزم .. وحزم مش يعني زعيق ولا غضب .. حزم يعني بجدية
اقوله ان سلوكك ده مش مناسب ومش حسمعك الا لما توقف غضب .. واتجاهل سلوكه لحد ما يهدأ ولما يهدأ احضنه واطلب منه يتكلم بهدوء وان هو ده اسلوب الحوار المناسب للتواصل .
لا توجد تعليقات