سامح نفسك

سامح نفسك

كثير من مرضى القلق والاكتئاب بيكون عندهم لوم للذات ومشاعر ذنب عالية على اي حاجة بيقولوها او اي تصرف بيتصرفوه و ده بيخليهم يغرقوا اكثر في مشاكلهم

سامح نفسك .. سامحي نفسك .. يا ترى اسامحها على ايه ؟!! هو انا غلطت في حاجة !! اوقات كثير نلاقي في العيادة مرضى القلق والاكتئاب والوسواس القهري بيشتكوا انهم طول الوقت بيلوموا نفسهم ويجلدوا ذاتهم .. ويفضل عقلهم طول الوقت شغال في الموقف الفلاني انا اتصرفت غلط .. ازاي انا اعمل كده ؟ مكنش المفروض اعمل كده او أقول كده وفي ناس ثانية بتقول انا بلوم نفسي على كل حاجة انا عملتها وماعملتهاش ماما شكلها متضايق .. ياترى هي مضايقة مني ؟ نع اني معملتش حاجة .. صاحبي ما سلمش عليا كويس يمكن انا ضايقته وانا مش واخد بالي وهكذا الشخصية القلقة او المكتئبة بيكون لوم الذات ومشاعر الذنب عندها عالية قوي .. وده بيخليهم يغرقوا اكثر في القلق او الاكتئاب او الوسواس ايه يعني غلطت !! كل بني ادم خطاء .. هو انت الوحيد الي غلطت بدل ما تلوم نفسك .. فكر ازاي تطور نفسك .. تكبرها .. تنجح اكثر .. تتعلم اكثر .. تتعلم من خبرتك عشان ماتكررش نفس الغلط اذا ربنا غفور رحيم .. ليه انت ماتستمحش نفسك وترحمها