الوسواس القهري

الوسواس القهري

فكرة ملحة ومتكررة والمريض عارف انها فكرة سخيفة أو مش راضي عنها ويحاول يقاومها وكل مايقاومها تزيد .

الوسواس القهري بيجي المريض في العيادة يقول انا عندي مشكلة مش عارف اتكلم ازاي .. انا بيجيلي أفكار استغفر الله العظيم.. انا بتجيلي الفكرة غصب عني.. انه بشكك في وجود ربنا .. أو ألفاظ شتيمة. ويكونوا عندهم مشاعر ذنب رهيبة. أو تجيلي أم مرعوبة انها تقتل ابنها أو زوجها وعشان كده مش بتستخدم سكاكين خالص. أو أم ثانية بتيجي منهارة جدا وتقول أنا لما أشيل ابني بعد الاستحمام بحس اني ممكن يجيلي نوع من الاثارة وممكن اؤذي ابني .. وتكون بتحاول تبعد عن طفلها عشان خايفة تؤذيه. أو الست الي تيجي وايدها محروقة من كثر استخدام المنظفات الي بتعقم بيها البيت وتفضل طول اليوم تنضف في البيت وكأنها بتعمل أشغال شاقة . وغيره بقى من الناس الي بتشك في الوضوء وتفضل ساعتين تتوضى أو تشك في الصلاة وتفضل تعيد الصلاة لحد ما تتعب وتوقف صلاة . والناس الي تعد السلالم وهي طالعة أو تعد اللمبات في الشارع أو تتأكد من قفل باب البيت أو العربية كذا مرة. والناس الي مش بتاكل خارج البيت لأنها مش ضامنة نظافة الأطباق أو المكان وغيره. كل ده احنا بنتكلم عن اضطراب الوسواس القهري يعني ايه وسواس قهري؟ من اسمه قهري يعني بيفرض نفسه على المريض ويجبره انه يعمل سلوكيات أو يفكر في أفكار غصب عنه فهو بيكون فكرة ملحة ومتكررة والمريض عارف انها فكرة سخيفة أو مش راضي عنها ويحاول يقاومها وكل مايقاومها تزيد . طيب هل هي ليها علاقة بالتدين ؟ المفاجئة انها مش دليل على ضعف الايمان ابدا ده بالعكس أوقات من كثر حرص الشخص على الالتزام يجيله وسواس طيب يعني ايه شخص متدين و يكون ده سبب المرض؟ ربنا قال ( وكذلك جعلناكم أمة وسطا ) في القران الكريم وقال كمان ( هلك المتنطعون ) في الحديث الشريف، والمتنطعون هما المغالون في العبادة. فربنا حثنا على الوسطية في كل شيئ فالتشدد في الدين بيقلب بمرض قلق أو وسواس قهري . طيب ايه العلاج العلاج هنا نوعين : علاج دوائي وعلاج سلوكي معرفي طيب ايه الي حيحصل لو أخدت دواء بس ؟ حتتحسن جدا وتختفي الأعراض بس لما توقف دواء وتتعرض لضغوط من غير ما تكون اتعلمت ازاي تواجه الضغوطط وتتعامل معاه بشكل ايجابي الوسواس حيرجع ثاني وترجع للدواء ثاني . لكن مع الجلسات حتتعلم ازاي توقف الأفكار وتعدلها وتتعامل مع الضغوطط بشكل ايجابي يقلل من تأثيرها عليك وتتعلم مهارات الاسترخاء وازاي تكون شخص مرن ، ده يساعدك على تجاوز الضغوط ويحميك من الوسواس بفضل الله.