نيو لايف سنتر

ابني المراهق اتعامل معاه ازاي

ابني عصبي وطول الوقت بيتخانق مع باباه ومش بيسمع كلام حد
ابني المراهق اتعامل معاه ازاي

لو سمحت .. من فضلك .. احترم ابنك 

أحترم ابني؟ يعني ايه؟ هو مين الي يحترم مين ؟

أيوة طبعا عارفة ان حضرتك الأب بس ابنك برده انسان وليه كرامة وغير ده كله ابنك حيتعلم منك الاحترام لما تعامله باحترام.

لو سمحت .. من فضلك .. خلي ابنك رقم واحد في حياتك

ماهو حياتي كلها !! هو أنا بعمل ده كله لمين؟

لو سمحت .. من فضلك .. افتخر بابنك واتباهى بيه قدام الناس عشان تكبره وتخلي عنده ثقة بنفسه وصورة ايجابية عن نفسه، مش عشان خاطر ترضي اخوك او صديقك تهين ابنك او تذله او تكسره  لو ابنك غلط .. قدم له توجيه ونصيحة على انفراد عشان تحافظ على كرامته قدام الناس 

ماتسمحش لأي حد أيا كان انه ينتقد ابنك أو يهينه وتقول ده عمه أو خاله أو راجل كبير .. لان كرامة ابنك من كرامتك 

ابنك لو مجابش المجموع الي كنت متوقعة دي مش نهاية الدنيا .. ولا ده عار .. ولا ابنك خذلك

مش اسم الكلية الي حيدخلها هي الي تخليك تفتخر بابنك .. ناس كثير في كليات قمة .. بس لا في تربية ولا اخلاق ولا شخصية
 
ابني في ابنك الاحترام لنفسه وللآخرين .. ثق فيه عشان يتعلم يثق في نفسه وفي الي حواليه

خد رأيه واتناقش معاه عشان يتعلم تحمل المسئولية

خليه ياخد قرارات وحمله مسئولية قراراته مع توجيه منك .. ولو غلط يتعلم من غلطه

صاحبه واحتويه عشان ماتسيبهوش يدور على حد غيرك يتعلم منه

لو انت قريب من ابنك حيرجع لك لما يكون عنده مشكلة ويتعلم من خبراتك

كل بني آدم خطاء .. محدش ملاك .. ما تنتظرش من ابنك يكون ملاك او يتصرف بشكل مثالي وتقول انا عاوزه يكون احسن واحد في الدنيا .. انت مكنتش احسن واحد في الدنيا لما كنت في سنه .. ومفيش حد احسن واحد في الدنيا

لما ابنك يتصرف بشكل يضايقك .. ارجع بذاكرتك ورى شوية وشوف كده .. لما كنت في سنه .. كنت عاوز تكون حر .. عاوز تلعب وتصاحب وتغلط .. عاوز تقول لا .. عاوز يكون ليك وجود .. عندك احتياج للاستقلال ... حسب مراحل عمرك المختلفة .. افتكر انت كنت ازاي وانت صغير عشان تعرف ان الي ابنك بيعمله او بيطالب بيه ده حق من حقوقه

لو ظروف حياتك وانت صغير كانت صعبة .. والدنيا دلوقتي افضل .. مش ضروري ابنك يعيش نفس حياتك بحجة انه يتعلم ان الحياة مش سهلة ولازم يتعب فيها .. انت تعبت عشان توفر لابنك حياة كريمة وعلمه برده تحمل المسئولية بطرق ثانية

الي عاوز ابنه يكون مثالي .. هو كده بيلغي تلقائيته . بيلغي شخصيته .. وبيحوله لرجل آلي متبرمج يعمل الصح وبس .. وبعد كده لما يكبر بيواجه صعوبات كثير في التفاعل مع الناس و الحياة.
ابني المراهق اتعامل معاه ازاي

ابني المراهق اتعامل معاه ازاي

فرع المهندسين

فرع مصر الجديدة
